Nakipag-olay si Presidente Ferdinand Marcos Jr. sa Japan-Philippines Parliamentary Friendship League, sa Tokyo tanganing itulod an mas makusog na relasyon kan Pilipinas asin Japan. Ipinahayag kaini an saiyang kamawotan na mabago an relasyon kan duwang nasyon sa sarong “Comprehensive Strategic Partnership” bilang simbolo nin halangkaw na lebel nin tiwala asin kooperasyon.
Segun ki Marcos, importante an pagkakaigwa nin makusog na alyansa urog na sa panahon na nag-oorog an tensyon sa Indo-Pacific asin angat sa pangkinaban na ekonomiya. Tinawan niya nin duon an importansya kan kooperasyon sa lado kan seguridad, depensa, asin pagmantenir kan orden sa rehiyon.
Sinambit man kan Presidente an mga eksistidong kasunduan sa pagultanan kan Pilipinas asin Hapon arog kan Reciprocal Access Agreement asin iba pang mga programa na nakakatabang sa pagpakusog kan seguridad sa dagat kan nasyon. Dugang pa kaini na mahalaga man an kooperasyon sa malinig na enerhiya, digital transformation, artificial intelligence, asin kritikal na mineral.
Mientrastanto, sinabi ni Atty Claire Castro, Palace Press Officer na nagdadakula an kumpiyansa kan mga foreign investors sa Pilipinas huli sa mga reporma na pig-iimplementar kan administrasyon. Kabale digdi an kampanya laban sa korapsyon asin pagpasimple kan mga proseso kan gobyerno para sa mga investors.
Padagos an pagtulod kan administrasyon ni Marcos para sa digitalisasyon kan mga serbisyo kan gobyerno, modernisasyon kan imprastraktura, asin iba pang mga lakdang tanganing makaakit nin mas dakul na foreign investment. Naglalaom man an Presidente na magigin matrayumpo an saiyang pagbisita sa Japan ngani na mas lalo pang mapararom an relasyon kan duwang nasyon.
