Kinumpirma ni Presidente Ferdinand Marcos Jr., an kahandaan kan Pilipinas asin Poland na punan an mga negosasyon para sa sarong extradition agreement.
Segun sa Punong Ehekutibo, nag-uuswag na ngunyan an legal na kooperasyon kan Pilipinas asin Poland matapos pirmahan an kasunduan sa pagbalyo kan mga nahukuman na preso asin an Mutual Legal Assistance in Criminal Matters.
Sa presentasyon kan mga kasunduan, kaiba sa iprinisentar kan Department of Justice (DOJ) asin Ministry of Foreign Affairs kan Poland an agreement on mutual legal assistance in criminal matters.
Katuyuhan kaini na pakusugon an kooperasyon sa paglikay asin paglaban sa mga krimen, kaiba an pinakusog na legal assistance asin kooperasyon sa criminal proceedings.
Segun ki Marcos, importanteng pundasyon kan relasyon kan duwang nasyon an tinatayang 25,000 Pilipino na nag-istar sa Poland.
