Nagbalik sa budget surplus an gobyerno kan Abril makalihis na makatala nin P31.4 bilyon na surplus, segun sa Bureau of the Treasury (BTr). Alagad, mas hababa ini nin 53.3% kumpara sa P67.3 bilyon kan Abril kan nakaaging taon. Ini man an ikaduwang surplus ngunyan na taon makalihis an surplus na nairehistro kan Enero.
Segun sa Bureau of the Treasury, apektado an koleksyon nin buwis huli sa pagpalawig kan deadline sa pag-file asin pagbayad kan Annual Income Tax Return poon Abril 15 sagkod Mayo 15. Ini inaprobaran ni Presidente Ferdinand Marcos Jr. huli sa paglangkaw kan presyo kan petrolyo asin gastos na dara kan tensyon sa Middle East.
An total na ingreso kan gobyerno kan Abril uminabot sa P536.8-B , mas halangkaw nin 2.8% kumpara kan nakaaging taon. Mientrastanto, an gastos kan gobyerno naglangkaw nin 11.1% na nagin P505.4-B. An koleksyon kan Bureau of Internal Revenue naglangkaw nin dikit mantang an kita kan Bureau of Customs naglangkaw nin dakula.
An mga ingreso kan gobyerno na bakong buwis naglangkaw man huli sa mga restitution funds gikan sa mga proyekto sa flood control fund asin mga kita sa privatization. Susog sa Treasury, an amay na mga remittances nin dividend remittances kan nagkapirang government-owned nakatabang man na mapalangkaw an kita kan gobyerno.
Puon kan Enero hasta Abril, nagbaba na sa P324 bilyones an budget deficit kan gobyerno hale sa P378.7 bilyones kan nakaaging taon. Target kan mga economic managers an orog pang pagbawas sa fiscal deficit ngunyan na taon sa P1.61 trilyon, o 5.3% kan gross domestic product kan nasyon.
