Pigsapubliko na kan opisina ni Senate President Alan Peter Cayetano an impeachment trial calendar na tutubudon nin gabos na imbwelto sa pagdangog asin pagprobar kay Vice President Sara Duterte.
Sakop kan nasambitang kalendaryo an labi sa duwang bulan kan taon ta nganing susugon an nagkairang kahagadan asin proseso sa gabos na lado nin impeachment.
Nagpuon an kalendaryo kan opisyal na mag-convene komo impeachment court kan Mayo 18, kun sain gabos na senador nagsumpa na komo senator-judges afuera ki Sen. Ronald “Bato” Dela Rosa, na napabaretang naghali sa premises kan Halangkaw na Katiripunan nin maagahon makalihis an baradilan sa Senado.
Segun sa kalendaryo, “non-extendible” o dai na mapapalawig pa an deadline kan depensa asin prosekyusyon sa pagtao kan saindang mga kasimbagan. Alagad kun kinakaipuhan, o para suboot sa “interes nin hustisya,” pwedesir pa suboot mabago an nagkapirang petsa sa katiripunan kan nasambitang iskedyul.
Mientrastanto, ikokondusir an pre-trial conference sa Hunyo 18 hasta 25, kasabay kan pagpaluwas nin pre-trial order kan nasambitang korte.
Para man sa pormal na trial, pupuonan ini sa Hulyo 6 hasta 22 antes magkaigwa ni Presidente Ferdinand Marcos Jr. kan saiyang ikalimang State of the Nation Address (SONA) mantang yaon sa break an lehislatura. Ipapadagos man ini sa Hulyo 28 asin sa mga masunod na aldaw makalihis itao kan pamayong ehekutibo an saiyang SONA.
Ngonian na aldaw, Hunyo 1, inaantisiparan na magsumite an kampo kan bise presidente nin kasimbagan makalihis magtao nin 10 aldaw an korte kan mga senador nin kahagadan sa paagi kan Issuance of Summons. Enkaso na magsumite sa oras an opisyal, mapuon naman an limang aldaw na itatao sa prosekyusyon ta nganing magpasar man nin saindang bersiyon nin kasimbagan.
