Nagpatanid an Ban Toxics sa publiko makalihis na madiskubre an presensya nin hazardous chemicals sa nagkapirang school supplies na ipinapabakal sa mga pampublikong merkado sa Metro Manila asin Naga.
Sa intrevista kan Bombo Radyo Naga ki Thony Dizon, Ban Toxics Campaigner, sinabi kaini na sa ginibong monitoring kan Mayo, napag-araman na igwa nin halangkaw na lebel nin tingga asin cadmium an nagkapirang school bag, mantang an nagkapirang plastic items siring kan sobre asin notebook igwa nin laog na PVC. Mientrastanto, an mga produktong papel napag-araman na ligtas susog sa saindang pag-analisar.
Susog sa grupo, an mga kaakian pwedeng ma-expose sa mga kemikal sa paagi nin paghangos, pag-inom hale sa kontaminadong mga kamot, asin direktang pagduta sa kublit. An mga kemikal na ini pwedeng magtipon sa hawak sa lawig nin panahon.
Idinoon kan Ban Toxics na an tingga puedeng makaapektar sa pagtalubo kan hutok asin IQ kan sarong aki. Nakarekord man sinda nin sagkod sa 9,000 ppm nin tingga sa nagkapirang school bag, na mas halangkaw pa sa lebel na pigkokonsiderar na ligtas.
Inabisuhan kan grupo an mga magurang na magpili nin mga produktong may markang “non-toxic,” likayan an sobrang kolor kan mga school supplies, asin tulos na i-report an mga kaduda-dudang produkto sa FDA o lokal na gobyerno para maprotehiran an salud kan mga kaakian.
