Nagadan an Sarong tawo asin labi sa 60 an nairido makalihis na tamaan nin mga drone strikes an Kuwait International Airport sa tahaw kan nag-oorog na tensyon sa pag-ultanan kan Estados Unidos asin Iran.
An Ministry of Defense kan Kuwait ilinadawan an pangyayari bilang “kriminal na agresyon kan Iran,” mantang an foreign ministry nagsabi na nagkapirang misyon diplomatiko an naraot sa pag’atake.
An Islamic Revolutionary Guard Corps (IRGC) nagsabi na sinda an nasa likod kan operasyon asin nagsabi na ini bilang pagbalos sa dai pa sana nahahaloy na aksyon kan Estados Unidos laban sa sarong Iranian oil tanker asin Qeshm Island. Nag-insistir man an Iran na pigpupuntirya kaini an mga base kan Estados Unidos sa manlaen-laen na parte kan rehiyon kan Gulpo.
An nagadan nakumpirma na sarong nasyonal na Indian, mantang an foreign ministry kan India nagsabi na nagkapirang mga namamanwaan na Indian an kabali man sa mga nalugadan asin nanawagan para sa tulos na paghale kan laban.
Bilang simbag, pinagbotan kan Kuwait an duwang diplomatikong Iranian na maghale sa nasyon sa laog nin 24 oras asin ipinaapod an Iranian na chargé d’affaires.
Susog sa U.S. Central Command (CENTCOM), nagkondusir man sinda nin mga welga sa Qeshm Island bilang simbag sa sinabi nindang mga planong pag’atake kan Iran sa Tahaw na Sirangan.
Sinabi man ninda na na-intercept ninda an nagkapirang drone asin missile kan Iran sa Kuwait, Bahrain, asin mga sibilyan na ruta sa dagat.
An Iran, sa ibong na lado, nag-insistir na ini nagbalos sana nin mga missile asin drone strikes laban sa mga base asin operasyon nin helikopter kan Estados Unidos sa sarong dai nginaranan na nasyon sa rehiyon, asin inakusaran an Kuwait asin Bahrain nin direktang pakikiaram.
