Nangapudan si Presidente Ferdinand Marcos Jr sa Senado na tulos na ibalik an saindang trabaho makalihis na maatraso an plenary sessions huli sa duwang aldaw na absence kan mga senador hale sa majority bloc. Segun sa Presidente, dakul pa an mga importanteng gibohon asin mga bills na kaipuhan na atubangon para sa karahayan kan mga tawo.
Sinabi pa ni Marcos na an pagpapadara sana nin kapwa senador bako supisyenteng rason tanganing kanselaron an sesyon. Sinabi niya na padagos an pag-otob kan Executive asin Judiciary kun kaya dae niya masabutan kun tano ta pinili kan lehislatura na suspendiron an saindang mga aktibidad.
Bilang dating miembro kan Kongreso asin kan Senado, nagpagirumdom an Presidente na igwa nin nakatalaan na proseso antes kanselaron an sarong sesyon. Kabali digdi an pagtao nin paisi sa ibang harong pirang aldaw bago an nakatalaan na pagkanselar asin pagkaigwa nin makusog na rason sa paggibo kaini.
Tinawang-duon man kaini na may direktang epekto sa publiko an anuman na kariribokan sa senado huli ta dae pwedeng isulong asin maipasar an mga kinakaipuhan na ley na mayong sesyon. Dae man suboot maiimplementar an mga programa na makakatabang sa mga namamanwaan kun dae nagpupunsionar nin tama an lehislatura.
Magigiromdoman na mayo nin sesyon kan Lunes makalihis na magboykot an mayoriyang bloke kasunod kan pagkadakop ki Jinggoy Estrada katakod kan kasong plunder. Para ki Marcos, dimalas an sitwasyon huli ta kaipuhan kan nasyon asin banwaan an tulos na tabang, alagad posibleng maatraso ini kun dai maipadagos kan senado an primerong katungdan kaini na paggibo nin mga ley.
