Ipigheras kan retiradong propesor na an sistematikong pag-aadal asin paggibo kan teknolohiya nin stingless bee nagpoon sa Central Bicol State University of Agriculture (CBSUA) kan huring parte kan dekada 1990.
Sa intrevista kan Bombo Radyo Naga ki Maria Dulce Jovillano-Mostoles (Dating Bise Presidente para sa Research and Innovation, CBSUA-Pili), ipinahayag kaini na kaibanan si Prof. Raul Ruiz asin Rodolfo Palkunitin, pigpromote ninda an pag-ataman nin katutubong putyukan bilang alternatibong pinagkukuanan nin kabuhayan kan mga paraoma sa Bikol asin iba pang parte kan nasyon.
Kan 2004, pig-introdusir kan grupo an Coco Shell Hive Technology sa sarong internasyonal na kumperensya sa Los Baños. An saindang inobasyon nagin sarong highlight asin nakakua nin interes gikan sa mga dayuhan na delegado huli sa potensyal kan mga produkto hale sa mga putyukan na daing sugat, kabali an propolis, pulot, asin mga serbisyo sa polinasyon.
Huli sa mga programa sa pagsiyasat asin ekstensyon kan unibersidad, an CBSUA pigmidbid bilang sarong Regional Center for Apiculture kan 2007 asin nag-ako nin suporta gikan sa Department of Agriculture–Bureau of Agricultural Research para sa dugang pang pag-aadal asin pagpapauswag kan industriya.
Apwera sa pagsiyasat, nangenot man an CBSUA nin mga pagsasanay para sa mga paraataman nin putyukan, mga paraoma, mga kababaihan, asin mga komunidad na apektado kan mga kalamidad, kabali na an mga biktima kan Bagyong Yolanda sa Tacloban. Tinawan man nin duon ni Dr. Mostoles an importansya kan responsableng pag-ataman nin putyukan asin pagprotehir kan kapalibutan sa tahaw kan nagdadakulang problema sa poaching o pagkua nin mga layas na kolonya hale sa kagubatan.
Susog saiya, labi sa 10,000 katawo an na-training sa irarom kan mga programa na saindang pig-promote, mantang padagos niyang pig-uurog an dokumentasyon kan historya asin teknolohiya kan mga putyukan na daing sugod para sa mga maabot na henerasyon kan mga paraataman nin putyukan asin mga parasiyasat.
