Nagpagirumdom an Department of Health (DOH) sa publiko na magin mapagmatyag asin mag-ingat laban sa mga helang na kadalasang naglalangkaw an kaso tuyong panahon nin tauran, kabali na digdi an water-borne diseases, influenza-like illnesses, leptospirosis, asin dengue o an inaapod na “W.I.L.D.” diseases.
Segun ki Albert Domingo, Assistant Secretary asin tagapagtaram kan DOH, importante na tulos na magpakonsulta sa pinakaharaning health center an mga taong naglusong sa baha tanganing malikayan an posibleng komplikasyon sa salud.Kasabay kaini, padagos na itinutulod kan DOH an kampanyang “4Ts” laban sa dengue tanganing mapugulan an pagdakul kan mga namok na nagdadara nin helang.
Kabali sa kampanya an Taob, o an pagbaliktad kan mga laganan na puwedeng matipunan nin tubig; Taktak, o an pag-ula kan natipo nag tubig sa mga bagay na puwedeng pamugaran nin lamok; Tuyo, o an pagmantiner na alang asin mayo nin natitipon na tubig sa palibot; asin Takip, o an pagtakop sa mga imbakan nin tubig tanganing dai ini istaran nin mga namok.
Ipinagirumdom man kan ahensya na pinakamadalas mangagat an mga lamok na may darang dengue poon alas-6 sagkod alas-8 nin aga asin poon alas-4 sagkod alas-6 nin hapon.
Base sa datos kan DOH, nakapagrehistro an nasyon nin 50,727 na kaso nin dengue poon Enero sagkod Mayo 2026. Mas nagbaba ini nin 56 porsiyento kompara sa 114,308 na kaso na nairehistro sa kaparehong panahon kan nakaaging taon.
Mantang padagos an tig-uran, pig-inkaminar kan DOH an publiko na regular na magsubaybay sa mga weather update, maggamit nin payong, kapote o bota sa pagluwas sa harong, asin siertohon na malinig asin ligtas an iniinom na tubig.
