Inaasahang makikinabang ang mga magsasaka sa Pilipinas mula sa posibleng pagbaba ng presyo ng krudo, abono, at gastos sa transportasyon kasunod ng kasunduang pangkapayapaan sa pagitan ng United States at Iran.
Ayon sa Department of Agriculture (DA), maaaring bumaba ang production at logistics costs sa sektor ng agrikultura dahil sa muling pagbubukas ng Strait of Hormuz, isang mahalagang ruta ng pandaigdigang kalakalan ng langis at iba pang produkto.
Sinabi ni Agriculture Secretary Francisco Tiu Laurel Jr. na malaking tulong ang pagbubukas muli ng Strait of Hormuz upang mabawasan ang gastos sa mga input na ginagamit sa produksyon at transportasyon ng mga produktong agrikultural, lalo na habang naghahanda ang bansa para sa bagong panahon ng pagtatanim ng palay.
Ayon naman sa Department of Energy (DOE), inaasahang maaaring bumalik ang presyo ng gasolina sa antas bago ang tensyon sa Iran sa loob ng susunod na anim hanggang 12 buwan.
Dagdag ni Tiu Laurel, hindi lamang makatutulong ang pagbawas ng gastos sa produksyon kundi maaari ring mapalakas ang daloy ng kalakalan sa pagitan ng Pilipinas at mga bansa sa Gitnang Silangan, na isa sa mahahalagang pamilihan ng mga produktong agrikultural ng bansa.
Kabilang sa pangunahing iniluluwas ng Pilipinas sa rehiyon ang sariwang pinya, Cavendish banana, gayundin ang mga processed food tulad ng canned tuna, sardinas, produktong niyog, at iba pang snack foods.
Nauna nang nagbabala ang DA na ang patuloy na pagkaantala sa kalakalan ng langis at abono ay maaaring magdulot ng mas mataas na production costs, pagbaba ng ani, at pagtaas ng presyo ng pagkain.
Tinatayang maaaring umabot lamang sa humigit-kumulang 18.8 milyong metriko tonelada ang produksyon ng palay ngayong taon dahil sa epekto ng mataas na production inputs.
Sa muling pagbubukas ng mahahalagang ruta ng kalakalan, inaasahan ng DA na mas makapaghahanda ang mga magsasaka at pamahalaan para sa susunod na planting season at iba pang hamon, kabilang ang epekto ng panahon.
Sinabi ni Tiu Laurel na ang inaasahang pagbaba ng input costs ay isang malaking ginhawa para sa sektor ng agrikultura at magbibigay-daan upang mas mapagtuunan ng DA ang paghahanda sa posibleng epekto ng El Niño.
