Ipinaliwanag ni Senador Pia Cayetano ang paggamit niya ng salitang “disaster” sa naging mainit na debate nila ni Senador Risa Hontiveros kaugnay ng mga iminungkahing amyenda sa Anti-Hospital Detention Law.
Ayon kay Cayetano, hindi niya tinututulan ang pagkakaroon ng mas matibay na proteksyon para sa mga mahihirap na pasyente na maaaring mahirapang magbayad ng gastusin sa ospital. Gayunman, iginiit niya na kailangang isaalang-alang din ang kakayahan ng mga ospital na manatiling pinansyal na matatag upang maipagpatuloy ang pagbibigay ng serbisyo sa kanilang mga komunidad.
Nilinaw ng senadora na ang kanyang tinutukoy sa paggamit ng naturang salita ay ang posibleng epekto ng mga pagbabago kung hindi magiging balanse ang mga polisiya. Aniya, mahalagang matiyak na mapoprotektahan ang karapatan ng mga pasyente habang napapanatili rin ang operasyon at sustainability ng mga institusyong pangkalusugan.
Nagkaroon ng palitan ng pananaw sina Cayetano at Hontiveros habang tinatalakay ang mga panukalang pagbabago sa batas na naglalayong pigilan ang pagpigil sa mga pasyente sa ospital dahil lamang sa hindi pa nababayarang bayarin.
Samantala, patuloy ang pagtalakay ng Senado sa mga posibleng amyenda upang mapalakas ang proteksyon sa mga pasyente nang hindi nalalagay sa panganib ang kapasidad ng mga ospital na magbigay ng kinakailangang serbisyong medikal.
