Pig enkaminar kan Vatican an mga Pilipinong Katoliko na magtarabangan tanganing malinig an mga komunidad gikan sa korapsyon, krimen, asin diskriminasyon.
Segun ki Vatican Ambassador to the Philippines, Archbishop Charles Brown, kaipuhan ngunyan kan mga komunidad na may kakayahan na halion o pugulan an korapsyon, krimen, asin iba pang klase kan pagkakasala, kabali na an diskriminasyon. Kaipuhan suboot an kooperasyon kan lambang Pilipino tanganing malabanan an mga problemang nagpapagabat asin nagpaparaot sa kalidad kan buhay asin mga pangarap kan kada saro.
Binalikan ni Archbishop Brown an pastoral vision ni Pope Leo XIV, na nag-iinkaminar sa lambang Simbahan asin sa mga Katoliko na magtarabangan sa paggibo nin karahayan tanganing magdanay an hustisya, katoninongan, asin pagrespeto sa mga karapatan kan lambang namamanwaan.
Ginibo ni Archbishop Brown an pangapodad kasabay kan nagpapadagos na Spiritual Retreat asin Plenary Assembly kan Catholic Bishops’ Conference of the Philippines sa Ozamiz City. Inatindiran an nasabing assembly nin labi sa 80 obispo gikan sa bilog na Pilipinas.
