Nananatiling mahigpit na binabantayan ng grupong Bikolana Gabriela ang takbo ng impeachment trial ni Vice President Sara Duterte, bagama’t maaga pa upang makabuo ng ganap na konklusyon hinggil sa kaso.
Sa panayam ng Bombo Radyo Naga kay Jen Nagrampa (Chairperson, Bicolana Gabriela), mahalagang matiyak na ang proseso ay magiging patas, malinaw, at magbibigay ng pananagutan sa paggamit ng pondo ng bayan.
Isa sa mga pangunahing alalahanin ng organisasyon ang inaasahang haba ng paglilitis na maaaring tumagal ng pito hanggang walong buwan. Iginiit ng grupo na ang matagal na proseso ay may kaakibat na malaking gastusin mula sa pondong nagmumula sa buwis ng mamamayan.
Napansin din ng Bicolana Gabriela ang naging matinding palitan ng argumento sa pagitan ng mga abogado ng prosekusyon at depensa, partikular sa mga usaping may kaugnayan sa grave threats. Gayunman, binigyang-diin ni Nagrampa na masyadong teknikal at legalistiko ang mga terminong ginagamit sa pagdinig, dahilan upang mahirapan ang mga ordinaryong Pilipino na maunawaan ang mga nagaganap sa loob ng korte. Dahil dito, nanawagan ang grupo na gumamit ng mas simpleng wika, kabilang ang Filipino o mga lokal na wika, upang maging mas accessible ang proseso sa publiko.
Mariin ding tinutulan ng Bikolana Gabriela ang argumento ng depensa na hindi dapat ma-impeach ang Bise Presidente dahil sa mahigit 32 milyong botong natanggap nito noong halalan. Ayon kay Nagrampa, ang mandato mula sa taumbayan ay hindi nagbibigay ng karapatang gamitin ang pondo ng gobyerno nang labag sa batas o sa paraang walang sapat na pananagutan. Aniya, ang impeachment trial ay isang legal at politikal na proseso na mahalaga upang matiyak ang transparency at accountability sa pamahalaan.
Kabilang sa mga pangunahing isyung binabantayan ng grupo ang umano’y paggamit ng confidential funds at ang pamamahala sa pondo ng Department of Education (DepEd). Ayon sa organisasyon, ang anumang iregularidad sa paggamit ng pondo ng edukasyon ay may direktang epekto sa kalidad ng serbisyong natatanggap ng mga mag-aaral, kabilang ang kakulangan sa silid-aralan, aklat, at iba pang pangunahing pangangailangan sa paaralan.
Umaasa rin ang Bikolana Gabriela na magiging patas at episyente ang pamumuno ni Senate President Chiz Escudero sa pagpapatuloy ng impeachment trial. Ayon sa grupo, ang magiging pagganap ng mga senador sa paglilitis ay magsisilbing batayan ng publiko sa pagsusuri sa kanilang kredibilidad bago ang mga susunod na halalan.
Sa mga susunod na pagdinig, inaasahang haharap ang Chief of Staff ni Vice President Duterte na si Zuleika Lopez. Patuloy ding hihimukin ng grupo ang publiko na bantayan ang mga ebidensyang ihaharap kaugnay ng confidential funds at pondo ng DepEd, habang nananawagan ng paggamit ng mas malinaw na wika sa mga pagdinig upang higit na maunawaan ng mamamayan ang proseso.
Ayon pa kay Nagrampa, ang impeachment trial ay hindi lamang usaping legal kundi isang mahalagang hakbang upang matiyak ang transparency, pananagutan, at wastong paggamit ng pondo ng bayan. Anila, ang tunay na layunin ng proseso ay ang mailabas ang katotohanan at mapanatili ang tiwala ng publiko sa mga institusyon ng pamahalaan.
