Tulos man na naglansar nin mahiwas na imbestigasyon an Baao Municipal Police Station (MPS) makalihis na makua an daing buhay na bangkay kan sarong dae pa nabibistong babae sa umahan sa kalabaan kan NIA Road, Zone 6, Barangay Sta. Teresita, Baao, Camarines Sur, kasuudma na pagka-aga kan Hulyo 22, 2026.
Sa inisyal na report, nadiskubre kan sarong lokal na paraoma an biktima na nakalubog sa laboy bandang alas 8:00 nin aga asin tulos na pigreport sa mga awtoridad.
Nagresponde an mga personahes kan pulis sa pangengenot ni, PMAJ Engelbert L. Toraldo, Chief of Police kan Baao MPS para maseguro an lugar asin magbugtak nin crime scene cordon para mapreserbar an mga posibleng ebidensya.
Tulos man na hinagad an tabang kan Scene of the Crime Operations (SOCO) na magkondusir nin technical processing asin forensic examination sa pinangyarihan kan insidente para makatabang na maaraman kun siisay an biktima asin an eksaktong kawsa kan saiyang pagkagadan. Sa ngonian, opisyal nang nakarehistro an kaso komo Death Under Inquiry.
Sa ngunyan, pighihiling kan BAAO PNP an gabos na anggulo para mabisto an biktima asin maaraman an sirkumstansya sa likod kan insidenteng ini.
Nangangapudan an Baao PNP sa sisay man na igwa nin nawawarang kadugo na babae o sisay man na nakareparo nin kaduda-duda na gawi sa lugar na makipag-ulay tulos sainda, tanganing makatabang sa imbestigasyon. An babae 142cm an langkaw asin nakasulot nin berdeng blusa asin pulang short pants.
Pigsierto kan Baao MPS sa publiko na padagos asin aktibo an follow-up operations. Pig-eenkaminar an sisay man na may magkakanigong impormasyon na makipag-ulay sa Baao Municipal Police Station.
