Binatikos kan mga progresibong grupo sa Bikol an State of the Nation Address (SONA) ni Presidente Ferdinand Marcos Jr., na inaapod na kulang ini sa konkretong kasimbagan sa mga pundamental na problema kan banwaan. Segun sa grupo, kulang an mga proyektong nasambit huli ta dae pa man giraray namamatean kan mga tawo an mga pagbabago sa pang-aroaldaw na pagkabuhay.
Sa intrevista kan Bombo Radyo Naga ki Jen Nagrampa (Chairperson, Bicolana Gabriela), sinaysay kaini na pigtawan-duon grupo na an hababang sweldo, halangkaw na presyo kan mga paninda, asin kakulangan nin mga pundamental na serbisyo nagdadanay na mayor na problema. Sinaysay kaini na an Economic Growth na nasambit sa SONA dae pa nahihiling kan dakul na ordinaryong Pilipino.
Sa Ciudad nin Naga asin iba pang parte kan Bicol, tinawan man nin atensyon an mga lokal na isyu arog kan planong pagpribado kan Naga People’s Mall, an isyu kan pagiging Highly Urbanized City kan Naga, asin problema sa daga na nakakaapektar sa mga paraoma.
Tinuyawman kan grupo an Rice Tariffication Law huli sa soboot pagdulot nin kasakitan sa mga lokal na paraoma, siring man an soboot kawaran nin makusog na aksyon kan gobyerno sa nagkapirang isyu kan soberaniya kan nasyon.
An mga progresibong grupo nag-apod para sa mas dakulang suporta para sa kakanon, salud, trabaho, asin paninimbagan kan gobyerno. Segun sa sainda, an tunay na sukol nin progreso bako sana sa mga pahayag kan liderato kundi sa kamugtakan kan mga ordinaryong namamanwaan.
