Ilinadawan an Kabataan Party-list Rep. Renee Co an State of the Nation Address (SONA) 2026 komo “underwhelming” huli sa kawaran nin malinaw asin konkretong mga lakdang tanganing masimbagan an mga mayor na problema kan nasyon na mga trabahador, edukasyon, asin korapsyon.
Sa intrevista kan Bombo radyo Naga ki Kabataan Party-list Rep. Renee Co, kulang pa an mga nasambit na programa kan gobyerno arog kan Pax Silica asin mga oportunidad para sa mga overseas Filipino workers (OFWs), nin huli ta dai kaini nasisimbagan an pangangaipo para sa nasyonal na industriyalisasyon asin dekalidad na pagmukna nin trabaho. Nag-insistir siya sa implementasyon kan ₱1,300 na sueldo sa pagbuhay para sa mga trabahador.
Tinatsaran man kan mambabatas an suboot kawaran nin malinaw na pondo para sa sektor nin edukasyon. Dawa sinambit an konstruksyon kan 16,000 na classrooms, sinabi ni Co na harayo pa ini sa pigkakarkulong 165,000 na classroom backlog sa bilog na nasyon. Mientrastanto, ilinadawan niya an pagdagdag nin 10,000 na mga counselor associates bilang pansamantalang simbag sa mas hararom na krisis sa salud nin isip sa mga estudyante asin pamilya.
Sa isyu kan korapsyon, partikular na sa flood control projects, sinabi ni Co na kinakaipuhan na magkaigwa nin mas mahiwas asin patas na imbestigasyon sa gabos na opisyal na imbwelto. Bakong suboot an pagsolo-solo nin nagkapirang personalidad kun an mga opisyales sa laog kan executive branch na posibleng imbuelto sa mga anomalya an dae man papaninimbagon.
Nangapudan man an Kabataan Party-list Represenative na si Co nin mga pagbabago sa sektor nin enerhiya asin agrikultura, kabali na an pag-amendar kan ley kan EPIRA, paghale kan VAT sa kuryente asin mga basic commodities, asin pagtao nin mas mahiwas na suporta sa mga paraoma asin parasira. Nag-insistir si Co na an tunay na pagbabago nangangaipo nin mas dakulang pondo para sa mga serbisyo publiko, distribusyon kan daga, pagprotehir kan mga deretso kan mga namamanwaan, asin paninimbagan kan gobyerno.
