Hinatulan sa sarong korte an ama kan sarong teenager na responsable sa sarong mass shooting sa sarong High School sa Georgia, U.S.A. kan 2024 na guminadan nin apat katawo sa 15 taon na pagkapreso.
Si Colin Gray, 55-anyos, napag-araman na nagkasala makalihis na mapatunayan na nagkasala nin kapabayaan asin pagtao sa saiyang aki na si Colt Gray kan badil na ginamit sa insidente.
Si Colt Gray, na ngonyan 16 anyos na, dati nang nasentensiyahan nin habambuhay na pagkakakulong na mayong posibilidad nin parole huli sa pambabadil sa eskwelahan.
Sinabi ni Judge Nicholas Primm na mantang dai pwedeng mapatawad an kulog na dara kan trahedya sa mga biktima asin sa saindang pamilya, an responsibilidad kan ama dapat na isuway sa krimen na ginibo kan saiyang aki.
Aram na ini an pinakaenot na pagkakataon sa Georgia na an sarong magurang nasentensiyahan nin 2 Counts of Murder huli sa sarong pambabadil na ginibo kan saiyang aki.
Susog sa mga piskal, igwa nin mga senyales na an teenager nagpapahiling nin madahas na gawi bago an pambabadil, alagad an saiyang mga magurang dai naggibo nin supisyenteng aksyon asin imbes garo baga pigtitios an kadahasan kan saindang aki.
Padagos na ginagamit kan mga piskal sa Estados Unidos an legal na lakdang na ini tanganing panimbagon an mga magurang na pigtutubodan na nagpabaya sa pagpadakula kan saindang mga aki, orog na sa pagkapot nin mga badil, bilang parte kan pagpugol sa naggrabeng mga insidente nin pambabadil sa eskwelahan sa nasyon.
