TINAWAN-DOON kan Department of National Defense o DND na legal an pagsumiter kan Pilipinas sa United Nations nin updated nautical chart na naglalarawan kan maritime zones sa palibot kan Panatag Shoal, na kontra sa pahayag kan China na ini “illegal, null and void.”
Sigun sa DND, an Bajo de Masinloc o Panatag Shoal parte kan teritoryo kan Pilipinas asin an mga maritime entitlement kaini nakabase sa United Nations Convention on the Law of the Sea o UNCLOS asin sa 2016 arbitral ruling manungod sa South China Sea dispute.
Sinabi kan ahensya na an pagsumiter kan updated nautical chart sarong lehitimong lakdang tanganing malinaw na maipaaram sa international community an mga hangganan kan maritime zones kan Pilipinas sa palibot kan Panatag Shoal.
Enot nang kinondena kan Chinese Ministry of National Defense an lakdang kan Pilipinas asin iginiit na an Huangyan Dao, na apod kan Beijing sa Panatag Shoal, iyo suboot an “inherent territory” kan China.
Sigun ki Senior Col. Chen Xi, tagapagtaram kan Chinese defense ministry, nilabag suboot kan Pilipinas an territorial sovereignty asin maritime rights kan China.
Kasabay kaini, ipinagtanggol ni Chen an joint military exercises kan People’s Liberation Army Southern Theater Command sa palibot kan Panatag Shoal, na sigon digdi sarong “serious warning” laban sa inapod kaining provocations kan Pilipinas.
Sinabi man kaini na nagsagibo an China Coast Guard nin law-enforcement training sa mga pagtaraid na katubigan.
Mientrastanto, pinahimutikan kan DND an mga alegasyon kan China asin sinabi na mapadagos an Pilipinas sa legal na paggamit kan soberanya kaini sa Bajo de Masinloc.
Kan Hulyo 2016, nagdesisyon an arbitral tribunal sa The Hague na an mga gapo sa Panatag Shoal na nasa ibabaw kan tubig pag high tide dai nagkikrear nin sadiri nindang exclusive economic zone o EEZ, asin continental shelf sa ilalim kan Article 121, paragraph 3 kan UNCLOS.
Alagad sinabi kan tribunal na igwa nin territorial sea an mga feature na ini asin dai man kaini pinagdesisyunan kun siisay an may soberanya sa Panatag Shoal.
Natukoy man kan tribunal na an Panatag Shoal haloy nang tradisyunal na fishing ground kan mga parasira hale sa Pilipinas, China asin iba pang mga nasyon.
Sinabi man kan tribunal na ilegal na hinarangan kan China an mga Pilipinong parasira sa paggamit kan saindang traditional fishing rights pagkatapos kan 2012 standoff.
