Nagkumpirmar an Abu Dhabi National Oil Company (ADNOC) kan United Arab Emirates ngonian na Sabado na an saro sa mga barko kaini inatake mantang nag-aagi sa Strait of Hormuz kan banggi kan Biyernes, Agosto 14. Ini an pinakahuring pangyayari sa mahalagang linya nin barko sa sentro kan pag-iiwal kan Estados Unidos asin Iran. Mayo man nin nairido sa insidente.
Sinabi kan ADNOC na importanteng maprotehiran an mga seafarers asin mamantenir an katalingkasan sa paglayag asin seguridad sa kadagatan. An pag’atake nangyari sarong aldaw pagkatapos na akusaran kan UAE an Iran na nag’atake sa duwang barko na konektado sa ADNOC mantang sinda nag-aagi sa Strait of Hormuz. An UAE Foreign Ministry makusog na kinondenar an pangyayari, na inaapod ining “hostile Iranian attack”.
Kan nakaaging semana, nagbareta an ADNOC na tolo sa mga tanker kaini an inatake sa agihan. Mientras tanto, an UAE Foreign Ministry separadong nag-anunsyo kan pag’atake sa saro pang tanker kan ADNOC. An serye nin mga pag’atake nagpalataw nin mga kahaditan manungod sa Strait of Hormuz, sarong mahalagang ruta nin suplay nin enerhiya sa bilog na kinaban.
An padagos na mga pag- atake sa Strait of Hormuz, na libreng maglayag bago magputok an giyera sa Middle East, nagdara man sa pagbagsak kan sarong untok-putokan sa pag’oltan kan Estados Unidos asin Iran kan Abril. Sa sarong kasunduan kan Hunyo, an Iran asin Oman, kaiba an ibang mga estado sa Gulpo, nagkaoroyon na makipag-ulay sa sarong balangkas para sa paggamit kan Strait of Hormuz susog sa eksistidong internasyonal na ley.
Kan nakaaging semana, an hepe kan seguridad kan Iran na si Mohammad Bagher Zolghadr nagbugtak nin mga kondisyon para sa pagbukas giraray kan Strait of Hormuz. Kabali digdi an pagtapos kan inaapod niyang giyera laban sa Iran asin sa mga kaalyado kaini, paghale kan mga sanksyon, asin pagbayad nin bayad para sa danyos sa giyera.
