Pigsierto ni Executive Secretary Ralph Recto na mas lalo pang madagdagan nin pondo asin suporta an administrasyon ni Presidente Ferdinand Marcos Jr para sa mga lokal na gobyerno para maparikas an paghatod nin serbisyo sa publiko.
Sinabi pa ni Recto na an National Tax Allotment (NTA) kan local government units (LGUs) maabot sa haros P1.4 trilyon sa 2027 na iyo an pinakadakula sa historya kan nasyon.
Sa kantidad na ini, P448.70 bilyon an mapapaduman sa 1,491 na munisipyo, mantang P303.56 bilyon an itatao sa mga probinsya, P263.97 bilyon an itatao sa mga barangay, asin an natatada sa mga ciudad.
Katakod kaini, P58.53 bilyones man an nakatagama para sa Local Government Support Fund (LGSF) sa lindong kan proponidong 2027 national budget. Ini man an pinakadakulang alokasyon para sa LGSF.
Sigon ki Recto, gagamiton an pondo sa mga proyekto arog kan mga tinampo, farm-to-market roads, water systems, health facilities asin buildings na pwedeng gibohon na evacuation centers.
Kabali man sa mga programa na suportado kan LGSF an pagtao nin 10 kilong libreng bagas kada duwang bulan sa haros walong milyon na pamilya.
Sinabi pa ni Recto na pinasimple man kan gobyerno an proseso sa paghagad sa LGSF na bawasan an requirements asin maparikas an pagpapaluwas kan pondo.
Pigsierto kaini na mas papahiwason pa kan gobyerno an suporta sa mga LGUs na may mga programa na epektibong nakakatabang sa mga namamanwaan.
