Dakulang tabang sa mga hograisers an pagkakaigwa nin sadiring anayon tanganing dai na magparabarakal pa nin piglets.
Segun ki Virgil Nuida, paratindang karne kan Barangay San Ramon, Pamplona, Camarines Sur, importanteng igwa nin sadiring anayon an mga hograisers huli ta grabe an kamahalan kan kada sarong piglet na posibleng magpakol sa labi P4,500 apwera pa sa halangkaw na presyo kan feeds o pambahog sa orig.
Segun ki Nuida, magastos na maray an pag-ataman nin orig alagad dakulang maray na tabang kun dai na babakalon pa kan mga hograisers an piglets na saindang aatamanon.
Tinawan-doon kaini na kun mahal an nabakal na piglets kan hograisers asin sasabayan pa kan mahal na presyo kan feeds, posibleng malugi an mga nag-aataman nin orig orog na kun magpakol sana sa P120 hasta P130 an presyo kan kada kilo kan buhay na orig.
