Nangapudan an Department of Environment and Natural Resources (DENR) sa publiko asin lokal na gobyerno na orog pang pakusugon an solid waste management.
Pigduon kan departamento na ini an pangenot na responsibilidad kan mga local government units (LGUs), kaiba an waste segregation, collection, resource recovery, recycling, asin iba pa, susog sa Republic Act No. 9003 o Ecological Solid Waste Management Act of 2000.
Sinasabing importante an implementasyon kan tamang waste management sa lambang komunidad tanganing dae ini maanod kan baha pasiring sa mga kanal, sapa, salog, baybayon asin Manila Bay, orog na sa padagos na epekto kan habagat sa nagkapirang parte kan nasyon.
Piglinaw kan departamento na natural phenomenon an Habagat alagad yaon pa sa kamot kan mga Pilipino an pagmanehar kan mga basura tanganing dae ini magbara sa mga agihan nin tubig na saro daa sa mga causa kan grabeng pagbaha.
