Nakagastos na nin haros P8 bilyon an Commission on Elections o Comelec sa padagos na paghahanda para sa Barangay asin Sangguniang Kabataan Elections o BSKE 2026.
An nasambitan na eleksyon nakatakda sa enot na semana nin Nobyembre 2026, alagad may panukala na liwat na dai idagos an halalan. Sa intrevista kan Bombo Radyo ki Comelec Chair George Garcia, iginiit niya na dakulang parte kan pondo kan komisyon an nagasto na sa paghahanda nin mga election paraphernalia, arog kan pag-imprenta nin mga balota.
Sa ngunyan, may natatada pang P11 bilyon na pondo na iginilid kan komisyon para sa honoraria kan mga paratukdong maserbisyo sa halalan, pondo para sa saindang training, asin para sa deployment kan mga kagamitan sa mga masunod na panahon.
Nakatakda man na pag-adalan kan Senado sa mga masunod na semana an panukala na dai idagos an BSKE 2026.
Segun ki Garcia, maaatubang siya sa nasambitan na pagdinig tanganing ihayag asin iladlad an kahandaan kan komisyon. Segun ki Chairman Garcia, hasta sa dai kinakansela an halalan, padagos an paghahanda kan komisyon, kabali na an pagbilog nin mga contingency measures.
Nataon kaya na panahon nin mga pagbaha an Nobyembre, kaya gusto kan komisyon na may nakahanda na mga contingency plan kun sakaling magkaigwa nin pagbaha bago asin sa mismong aldaw kan halalan.
Gikan sa record kan COMELEC, haros 70 milyon na Pilipino an kwalipikadong makaboto sa BSKE 2026.
