Preparado na an Philippine Red Cross sa seguridad asin medikal na pangangaipo sa Peñafrancia Festival.
Sa intrevista kan Bombo Radyo Naga ki Maria Felisa Badiola – Chapter Administrator, Philippine Red Cross – Camarines Sur Chapter, sinaysay kaini na pirming preparado an Philippine Red Cross (PRC) Camarines Sur Chapter, lalo ngonian na maabot na Peñafrancia Festival.
Dugang pa kaini amay sindang nagpreparar huli kinakaipuhan na makipagkomunikar sa National Headquarters para sa suporta, koordinasyon, asin pagplano kan mga aktibidad, kabali na an pagdeploy nin mga volunteer para sa seguridad asin kapakanan kan mga deboto asin publiko.
Magkakaigwa man nin mga medical stations asin mini stations kun sain ide-deploy an mga lisensyadong first aiders para maghatod nin agarang tabang medikal.
Segun ki Badiola, kan nakaaging taon, nagpakol sa 285 an total manpower kan chapter, kabali na an mga First Aider, Emergency Medical Services Personnel, Emergency Medical Technician Personnel, asin Logistics Personnel.
Sinabi pa kaini na an mga First Aider ede-deploy sa kalabaan kan Penafrancia, Elias Angeles St., asin Plaza Rizal. Partikularmente man na ginagamit sa pagrerescue o pagtransport kan mga nangangaipo nin medikal na asistensya an Ambulansya.
Dugang pa kaini, an mga kaso nin emerhensiya, arog kan difficulty in breathing, mga lugad, asin abdominal pain, kaya kaipuhan na may mga nakaatender na medical personnel sa kada emerhensiya, mayor man o minor an kaso, tanganing matawan nin tama asin tulos na primerong lunas an mga pasyente asin malikayan an posibleng paglala kan sitwasyon.
Nagpagirumdom si Badiola sa gabos na pirming isipon asin inoton an kaligtasan, lalo na ngonian na Peñafrancia Festival na piglalaoman na magigin dakul an tawo.
Dugang pa kaini na magdara nin mga personal na kaipuhan arog kan tubig, panyo, o protective gear.
Mientrastanto, pigpaluwas na kan Naga City Government an schedule kan mga aktibidad para sa Peñafrancia Festival na mapuon sa masunod na bulan. An highlight kan Peñafrancia festival iyo an Traslacion Procession na gigibuhon sa Setyembre 11, 2026.
