Nag abot sa P2.6 bilyon an soboot confidential funds ni Bise Presidente Sara Duterte kan siya pa an Mayor kan Davao City poon 2016 hasta 2022, segun sa prosecution panel sa impeachment trial.
Ini an ibiniyagyag ni Atty. Amando Virgil Ligutan makalihis na komprontahon an hostile witness na si Gina Acosta, dating Special Disbursing Officer (SDO) kan Office of the Vice President (OVP), gamit an sarong infographic hale sa record kan Commission on Audit (COA).
Base sa datus, an Davao City nakatala nin confidential expenses na uminabot sa P2.6 billion sa laog kan anom na taon ni Duterter bilang Mayor; P144 milyon kan 2016; P294 milyon kan 2017; P420 milyon kan 2018; asin P460 milyon kada taon poon 2019 sagkod 2022.
Segun ki Ligutan, an P460 milyon kada taon poon kan 2019 hasta 2022 simpleng kalkulasyon sana na katumbas kan P1.84 bilyones, haros P2 bilyones sa laog nin apat na taon.
Si Acosta an nagmanehar kan confidential funds ni Sara kan siya Mayor pa asin magin ng italaga siya bilang SDO sa OVP.
Siring man, kan hinapot si Acosta kun igwa siyang kaaraman sa nasabing kantidad, sinabi kaini na dae niya matandaan. Suboot, naggugurang na siya asin nagigin malingawon na sa nagkapirang detalye. Dugang pa ni Ligutan na mas dakula pa an confidential funds ni Duterte bilang Mayor kan Davao City kumpara sa P612.5 million na confidential funds na kapot niya sa OVP asin Department of Education poon 2022 hasta 2023.
