Kinuwestyon kan mga estudyante kan Pamantasan ng Lungsod ng Maynila o PLM an desisyon kan Board of Regents na tawanan nin honorary Doctor of Laws degree si President Ferdinand Marcos Jr.
Sa sarong joint statement kan PLM Supreme Student Council asin 33 pang student councils asin organizations, sinabi ninda na dai sinda nakonsulta manungod sa pagbistong iginawad sa Presidente, asin puwedeng mahiling ini bilang sarong pag-endorso sa administrasyon ni Marcos na padagos umanong napapaatubang sa mga isyu nin transparency, accountability asin human rights.
Tinawan doon kan mga estudyante na dapat mas halangkaw an pamantayan sa pagtao nin honorary degree kisa sa posisyon o kamugtakan kan sarong personalidad.
Ipigheras man kan mga ini an kasaysayan kan PLM asin an alaala ni Liliosa Hilao, sarong student journalist kan unibersidad na nagadan habang nakadetine kan panahon kan Martial Law sa irarom kan administrasyon kan dating President Ferdinand Marcos Sr.
Ginawaran si Marcos Jr. nin honorary Doctor of Laws degree kan PLM kan Agosto 27 komo pagbisto, segun sa unibersidad, sa saiyang suporta sa mga proyekto kan eskwelahan, kabali an konstruksyon kan PLM Medicine and Allied Sciences Building.Mientrastanto, naghagad man nin paglilinaw an PLM College of Law Student Council kun nasunod an mga pamantayan kan Legal Education Board sa pagtao nin honorary degree.
Partikular nindang kinuwestyon kun natugunan ni Marcos an requirement na dapat may baccalaureate degree o katumbas kaini gikan sa sarong binibistong institusyon.Segun sa University of Oxford, dai nakumpleto ni Marcos an saiyang Bachelor of Arts degree sa Philosophy, Politics and Economics, asin imbes kaini, ginawaran siya nin Special Diploma in Social Studies kan 1978.
Sinabi ni PLM Board of Regents Chair Edward Serapio na naninindigan siya sa pagtao nin honorary degree ki Marcos bilang pagkilala sa suporta kan Presidente sa edukasyon asin sa pagpapatugdok kan bagong gusali kan unibersidad.
