Sa intrevista kan Bombo Radyo Naga ki Nephtali R. Pabines, Market Supervisor kan MEPO, sinabi kaini na sa pag-abot kan Kafiestahan, ipatutupad an mga probisyon kan Ordinance No. 2014 bilang basehan kan mga regulasyon para sa mga vendors na magnenegosyo sa panahon kan selebrasyon.
Nakaslaag sa ordinansa an mga panundon na dapat sundon kan mga nagtitinda, pati na an mga lugar na itinalaga asin pigtutugutan sana na pagpwestoan kan mga vendors.
Segun ki Pabines, nag-aako man nin aplikasyon an Barangay Captain kan Balatas para sa mga vendors na gustong magpwesto sa Basilica Road sa panahon kan Kafiestahan. May mga pwesto man na bubuksan para sa mga vendors sa Berlin asin Sta. Cruz. Alagad, dae kabilang sa mga lugar na papayagan para sa pagpwesto kan mga vendors an Elias Angeles, General Luna, asin J. Hernandez.
An mga vendors na taga-Naga, haros aram na an mga lugar na bawal asin pinapayagan na pagpwestoan sa panahon kan Kafiestahan. Alagad, para sa mga vendors na dayo, importante an tamang pagtutukdo asin pagtatalaga kan lugar na saindang pagpwestoan, huli dae dapat magpwesto kun sain-sain anganing mamantinir an kaayusan asin masiguro an pagsunod sa mga itinakdang regulasyon.
Mayo man itinalaan na limitasyon sa bilang kan mga vendors na matinda. Alagad, 2×2 metro lamang an itatalagang espasyo para sa kada vendor tanganing mamantinir an maayos na pagkakaayos kan mga pwesto asin magkaigwa nin sapat na lugar para sa pag-agihan kan mga tawo.
Nangapudan man an MEPO sa gabos na vendors na magsunod sa mga panundon o regulasyon tanganing maging maayos, ligtas, asin mapakarhay an pagnenegosyo asin pagtitinda sa panahon kan Kafiestahan.
