Nagpaluwas nin patanid an Office of Civil Defense (OCD) asin mga lokal na gobyerno sa publiko, partikularmente sa mga residente kan Metro Manila asin mga pagtaraid na probinsya, na mag-ingat sa maluyang kalidad kan aire dara kan mahibog na haze o aso na naghahale sa kasulo sa kagubatan sa Kalimantan, Indonesia.
Segun ki OCD Deputy Administrator Assistant Secretary Raffy Alejandro, mahibog na aso hale sa wildfires sa Indonesia an naglaog sa nasyon makalihis na darahon kan nangingibabaw na duros pasiring sa rehiyon.
Nin huli kaini, maski an nagkapirang LGU nagpaluwas nin sadiring advisories.
Nag-abiso si Caloocan City Mayor Along Malapitan sa mga namamanwaan na magsulot nin face mask kun maluwas sa saindang mga harong tanganing maibitaran an posibleng epekto sa salud makalihis na mairekord an maluyang kalidad kan aire sa saindang ciudad asin sa bilog na Metro Manila.
Base sa report, sarong mahibog na layer nin haze an naitala na nagtahob sa skyline kan Metro Manila, na malinaw na mahihiling hale sa Antipolo City, Rizal alas 5:48 nin aga ngonian na Martes, Setyembre 1.
Pigpaliwanag kan Department of Environment and Natural Resources–Environmental Management Bureau (DENR-EMB) na padagos an saindang pagmonitor kan kalidad kan aire sa mga apektadong lugar, lalo na sa National Capital Region (NCR), CALABARZON, asin MIMAROPA.
Sa ngonian, padagos na pig-aases kan mga otoridad an lebel kan polusyon asin an kapal kan aso para madeterminaran asin mapreparar an epekto kaini sa salud kan publiko asin sa kapalibutan.
