Mantang an kalidad kan paros sa Metro Manila medyo nag-maray sa ibong kan haze gikan sa mga sulo sa kakahuyan sa Indonesia, segun sa Department of Environment and Natural Resources (DENR) nagsabi kan Miyerkules na an “unhealthy” na paros ngonyan nakakaapektar sa Visayas asin Mindanao.
Segun ki Jundy del Socorro, Chief kan Environmental Quality Management Division kan (DENR), pitong lugar sana sa Metro Manila an nagdadanay na “unhealthy” para sa mga sensitibong grupo: Las Piñas, Makati, Malabon, Parañaque, Katipunan asin Commonwealth sa Quezon City, asin Taguig.
Mas marhay ini kisa sa report kan Martes, kun saen an haros bilog na rehiyon “unhealthy.”
Alagad, an paros sa Puerto Princesa, Palawan, nagdadanay na bakong marahay, asin naitala naman an “unhealthy” levels sa Talisay City (Cebu), Tagoloan (Misamis Oriental), Cagayan de Oro City, asin Iligan City.
Pinatanidan ni Del Socorro an publiko, lalo na an mga may comorbidities asin an mga nasa vulnerable sector, na delikado an paghangos nin pinong particulate matter hale sa haze.
Kun “unhealthy” man, magdanay sa laog kan harong, o magsulot nin face mask kun maluwas. Kun mayo kan N95 mask, an DOH nagrerekomendar na basaon an ordinaryong face mask o tela arog kan panyo tanganing ma-trap an mga pinong partikulo. Isara an mga bintana asin pinto, uminom nin tubig, asin mag-inom nin mga bitamina.
Kun nakakamati nin kadipisilan sa paghangos, grabeng abo, kulog sa daghan, o iba pang sintomas, magkonsulta tulos sa doktor.
