Nagtutubod an kampo ni Bise Presidente Sara Duterte na posibleng pahalipoton an impeachment trial kun dagos nag basurahon o babawion kan prosecution panel an Article 3, na nagtutukar kan mga alegasyon nin suhol o panunuol laban sa mga opisyales kan Department of Education.
Segun sa Defense Deputy Spokesperson Atty. Justin Nicol Gular, pighahalat pa kan saindang lado an pinal na desisyon kan prosecution kun babawion, mamantinir, o ipapadagos an nasabing sugo antes sinda magpaluwas nin dugang na opisyal na pahayag.
Nanindugan si Gular na irerespeto kan depensa an anuman na desisyon kan piskalya asin preparado sindang i-adjust an legal na preparasyon basado sa maluwas na desisyon.
Katakod kaini, bukas man suboot an kampo kan Bise Presidente sa mga proponidong stipulation hale sa prosecution panel. Alagad, kaipuhan muna nindang repasohon asin pag-adalan nin maingat an mga probisyon kaini bago itao an saindang opisyal na simbag.
Sinierto man kan legal team na preparado sinda para sa mas halawig na trial sessions, kabali an bilog na aldaw na hearing, ngani na makasabay sa piglalaoman na sibot na calendar asin schedule kan Senado.
Tinawan duon ni Atty. Gular na kabale sa saindang bilog na pag-andam an pagigin preparar bako sana sa legal na mga bagay asin dokumento, kundi pati na sa pisikal asin mental na angat nin halawig na paglilista.
