Narescue an walong babaye kabale an mga menor de edad kan mga awtoridad sa ginibong anti-human trafficking operation sa Libmanan, Camarines Sur kan Setyembre 2. Duwang indibidwal an naarestar katakod kan insidente.
Sa intrevista kan Bombo Radyo Naga ki PCPT. Angelo Babagay – Team Leader, Naga, Camarines Sur Cyber Response Team, haloy nang pigbabantayan kan mga awtoridad an mga kaduda-duda na aktibidad may kinaaraman sa recruitment kan mga biktima. Kadaklan daa kan recruitment ginigibo sa paagi kan social media asin iba pang online platforms, mantang an iba naaakit sa paagi nin mga referral.
Sinabi pa ni Babagay na ginagamit kan mga recruiter an mga job offer arog kan pagiging promoter o paratinda nin produkto tanganing makaakit nin mga biktima. Nagluluwas man sa imbestigasyon na posibleng bako sanang sa Camarines Sur an operasyon kan grupo, huli ta posibleng recruit man sinda hale sa ibang probinsya sa rehiyon.
Makalihis an operasyon, ipinagkatiwala sa Department of Social Welfare and Development (DSWD) an mga nasalbar na biktima para sa magkakanigong pag-ataman asin interbensyon. Mientrastanto, pigpreserbar kan cyber response team an mga digital na evidencia, kabale na an online conversations asin chats, mantang pighahalat an search warrant para sa mas hararom na eksaminasyon kan mga cellphone na nakumpiskar sa mga suspechado.
Nahahampang sa kasong trafficking in persons an duwang naarestar na suspechado. Padagos pa an imbestigasyon tanganing maaraman kun igwa pang ibang biktima, recruiter, o kasabwat. An mga pulis nag-aghat sa mga magurang asin mga hobenes na magin mapagbantay sa mga alok nin trabaho sa online asin dai magtiwala sa mga dai midbid na mga pararekrut.
