Pormal nang isinangat kan Office of the Ombudsman sa Sandiganbayan an kasong plunder laban ki dating House Speaker Martin Romualdez, dating Ako Bicol Representative Zaldy Co, asin iba pa, huli sa sinasabing anomalya sa flood control kickback scheme.
Sa bagong legal na lakdang na ini, nanawagan an kampo ni Romualdez nin patas na pagtrato tanganing matawan sinda nin igong oportunidad na simbagan an mga bagong akusasyon.
Idinugang kan saiyang legal counsel na si Atty. Ade Fajardo na dapat kuta sinda inabisuhan kan Ombudsman manungod sa opisyal na pahayag ni dating DPWH Sec. Manuel Bonoan durante kan preliminary investigation.
Hinagad man kan saiyang legal na grupo na mahiling an mga pahayag kan 28 bagong testigo kan Ombudsman tanganing makapagsumite nin pormal na simbag asin kontra-affidavit.
Nagpoon an pagkakadawit ni Romualdez sa kontrobersiya kan Setyembre 2025 kan pangaranan siya kan nagkapirang contractor asin dating security personnel sa mga pagdangog sa Senado.
Pirang beses nang matagas na idinenegar kan mambabatas an mga akusasyon nin kickback, na iginigiit na mayo siyang ano man na koneksyon sa pagpaluwas nin pondo o sa pagimplementar kan mga proyekto kan DPWH.
Binigyang-duon pa kan legal na grupo ni Romualdez na mayo nin makusog asin mapagtitiwalaan na testigo na direktang nag-uugnay saiya sa sinasabing anomalya sa mga proyekto nin flood control.
