Mas pinakusog kan Naga City Government an mga lakdang kontra sa padagos na paglangkaw kan kaso nin dengue sa ciudad. Kabali sa mga pig-aandam na lakdang iyo an pagpahiwas kan kapasidad kan ospital, an pagpapaotob nin mas mahigpit na health protocols, asin an pagpapautob nin intensive surveillance sa mga barangay tanganing tulos na mabisto asin mabulong an mga may helang.
Sa paghampang sa mga kagawad kan Media ni Naga City Mayor Leni Robredo, sinabi kaini na tinawan nin instruksyon an mga Barangay Health Workers (BHW), mga health centers, asin mga barangay na siertohon na an mga pasyenteng may kalintura tulos na irerefer sa ospital sa laog nin 48 hasta 72 oras. Padagos man an paghahanap asin pagraot kan mga breeding sites kan lamok, mga kampanya sa impormasyon, asin mga pagirumdom sa publiko na magsunod sa 4S laban sa dengue asin maggamit nin personal protective measures.
Pinahiwas man an kapasidad kan Naga City Hospital sa pagdagdag nin tolong ward na igwang 40 dagdag na higdaan. Pig-aandam man an iba pang mga pasilidad kan ciudad na magserbing dugang na isolation asin treatment area kun kinakaipuhan, mantang ipapaotob an mas marikas na admission process tanganing maibitaran an pagkaatraso sa pagbolong.
Base sa pinakahuring datus, nangengenot an Barangay Concepcion Pequeña sa may pinakahalangkaw na kaso, na nag-abot sa 85 sa total na 307 na kaso nin dengue sa ciudad. Kasunod kaini an mga barangay kan Cararayan, Concepcion Grande, San Felipe, asin Carolina, na kabale man sa mahigot na pigbabantayan kan lokal na gobyerno.
Pigtutulod man kan ciudad an pagdeklarar nin state of calamity tanganing maparikas an paggamit kan Pondo para sa pag-hire nin dugang na health workers, pagbakal nin bulong, medical supplies, fogging equipment, asin iba pang kinakaipuhan na kagamitan. Segun pa kay Robredo, obheto kaini na maparikas an pagresponde sa naglalalang sitwasyon asin maibitaran an pagdakol kan kaso asin pagkagadan dara kan dengue.
