Posibleng bawasan kan Metro Naga Water District (MNWD) an bilang kan mga proyekto na pwede kaining iimplementar huli sa paglangkaw kan presyo kan materyales asin iba pang gastos, mantang naghahalat kan pag-download kan ₱135 milyon na loan hale sa Local Water UtilitiesAdministration (LWUA).
Sa intrevista kan Bombo Radyo Naga ki Floroncio T. Mongoso Jr., General Manager, MNWD, sinabi kaini na duwang taon na an nakaagi poon kan maisumite an proposal para sa proyecto, caya dae na bastante an orihinal na budget para sa presenteng presyo kan materyales. An gastos pigkakarkulong naglangkaw nin 10 sagkod 15 porsyento, apuera pa sa epekto kan mga paglangkaw kan sweldo asin nagbabago-bagong presyo kan petrolyo na nakakaapektar sa gastos kan mga materyales na ginagamit sa konstruksyon.
Huli kaini, sinabi kan water district na kun dae madagdagan an fondo, posibleng siyam o walo sana sa cada sampulong planong proyecto an maiimplementar. An ano man na kakulangan papanuan kan MNWD gamit an internally generated funds tanganing maipadagos an mga mayor na proyekto sa supply nin tubig.
An pautang na ₱135-M ibinibilang na tabang pinansial huli an interes apat sanang porsiento asin puedeng bayadan sa laog nin 15 taon. Alagad kaipuhan pang mag-agi sa Monetary Board Opinion kan Bangko Sentral ng Pilipinas antes mailuwas an pondo na posibleng umabot nin duwa hasta tolong bulan, mantang an proseso kan bidding piglalaoman na maabot pa nin tolo hasta apat na bulan bago lubos na maiimplementar an proyekto.
Mientrastanto, padagos an ginigibong lakdang kan Metro Naga Water District tangani na masimbagan an kakulangan nin tubig, kabali na an operasyon kan 14 pumping station 24 oras kada aldaw asin an pagtogdok nin 12 dagdag na pumping station asin transmission lines.
Ipinahayag man ni Mongoso na an tubig hale sa nagkapirang burabod nagbaba nin kinakarkulong 35 sagkod 40 porsyento, na nagtulod sa orog na pagpakusog kan preparasyon asin pagpahiwas kan imprastraktura nin tubig huli padagos an paglangkaw kan pangangaipo sa tubig sa Ciudad nin Naga.
