Piglalaoman na maatubang sa Sandiganbayan si Leyte Representative Martin Romualdez bilang testigo sa sadiri niyang depensa sa P7.44-billion na plunder case kontra saiya.
Segun sa saiyang abogado na si Atty. Ade Fajardo, mawot ni Romualdez na magkaigwa nin pagkakataon na madepensahan an saiyang sadiri matapos na pormal na tapuson kan Sandiganbayan Third Division an pre-trial proceedings.
Pwede man na ipresentar kan depensa an nagkapirang security aides asin driver kan mga kaibang akusado na dating Ako Bicol Representative Zaldy Co, kabale si Orly Guteza, na suboot binawi an saindang mga naenot na pahayag.
Segun ki Fajardo, sinabi suboot ni Guteza sa saiyang bagong sinumpaan na pahayag na parte kan setup an dati niyang testimonya.
An depensa pigkakarkulong igwa nin mga 40 posibleng testigo, alagad ini pwedeng magbago depende sa ebidensya na iprinesentar kan prosekusyon.
Romualdez,padagos na nakakulong sa Quezon City Jail–Male Dormitory sa Payatas, mantang an tolong kaiba niyang akusado, kabale si Co., padagos na at large.
Mientrastanto, sinadol kan Sandiganbayan an abogado ni Romualdez na si Judd Roy makalihis na hapoton kaini an media dapit sa pagbasa kan impormasyon kan arraignment.
Pigpagirumdom kan jusgado na regular ining parte kan proseso ngani na masierto an deretso kan akusado na maaraman an mga akusado kontra saiya.
Sa saiyang parte, sinabi ni Fajardo na iginagalang kan depensa an posisyon kan korte asin dapat na magdanay na magalang an mga abogado bilang mga opisyales kan korte.
