Kinontra ni Sen. Panfilo “Ping” Lacson an pahayag ni Department of Public Works and Highways (DPWH) Secretary Vince Dizon na mayo nin ghost projects sa Taguig City.
Kun babalikán an nagin enot na pagdangog kan Senate Finance Committee para sa 2027 proposed budget kan ahensya, hinapot ni Sen. Alan Peter Cayetano si Dizon kun igwa nin ghost project sa Taguig.
Segun ki Dizon, base sa mga pagsusuri kan DPWH asin sa presenteng rekord kan ahensya, mayong nakalistang ghost project sa nasabing syudad.
Alagad segun ki Sen. Lacson, salungat ini sa mga site inspection report na hale mismo sa naturang ahensya.
Primero igdi an dai pag-match kan reports na ipinasa mismo kan mga personnel hale sa DPWH Bureau of Maintenance, Quality and Safety, Construction, asin Research and Standards.
Binalikan kan beteranong senador an laog kan mga inspection report na nagpapahiling nin pirang flood control project sa Taguig na dati nang dineklara komo kumpleto, alagad dai ninda na-validate an mga ini, base sa nakalaag na lokasyon.
Giit ni Sen. Lacson, tama lamang na maimbestigaran an mga primerong impormasyon na iniluwas kan DPWH manungod sa mga public infrastructure project sa nasabing syudad.
