Pinatunayan ni Senate Committee on Energy Chairman Erwin Tulfo na dae pwedeng ibalyo sa ibang parte kan electricity bill an systems loss charges kun tulos nang hahalion an nasabing singil sa mga konsyumer.
Ginibo ni Tulfo an pahayag matapos na pangambahan kan nagkapirang konsyumer na tibaad mabawi sana kan mga electric company an mawawarang systems loss charge sa paagi kan paglangkaw kan distribution, supply o iba pang singil.
Segun ki Tulfo, malinaw sa Senate Bill No. 2486 o “Systems Loss Charge Removal Act” na dae pwedeng i-recover kan distribution utilities asin electric cooperatives an allowed losses sa paagi kan iba pang charges.
Kaiba digdi an distribution wheeling charges, supply charges, metering charges, universal charges asin subsidies, siring man an iba pang parte kan electricity bill.
Segun saiya, dae pwedeng halion an systems loss charge sa sarong parte kan bill pero isingit sana an parehong gastos sa ibang singil.
Ini-sponsor ni Tulfo sa plenaryo kan Setyembre 22 an panukala, na kaiba sa mga priority measure kan administrasyon.
Idiniin kan senador na dae dapat pasanon kan mga konsyumer an halaga kan kuryenteng dae man ninda nagamit, orog na kun naghahale an losses sa problema sa pamamahala o kagamitan kan mga electric utility.
Hinagad niya an marikas na pag-uswag kan panukala tanganing tulos nang mahali an systems loss charge asin maprotektahan an mga konsyumer laban sa posibleng pagbalyo kan nasabing gastos sa ibang parte kan saindang bill.
Segun saiya, pangenot na pangangaipo an kuryente kaya dapat seguraduhon na marhay an serbisyo asin patas an singil sa mga mamimili.
