Naghain na nin kaso laban sa kapitan kan nasulong barkong MV June Aster, kasabay kan nakatalaan na salvage operation sa katubigan kan Coron, Palawan.
Segun ki Philippine Coast Guard Spokesperson Commodore Noemie Cayabyab, ipinapasa na ninda sa proper forum an pag-uswag kan legal charges.
Inot igdi, nagluluwas sa imbestigasyon kan Enforcement Service kan Maritime Industry Authority (MARINA) na an salang pag-imbak nin mga flammable cargo an saro sa mga pangenot na rason kan pagkasulo kan barko kan Setyembre 9, 2026, na ikinagadan nin 77 indibidwal.
Segun ki MARINA Region IV Regional Director Maximo Bañares Jr., naaraman na dakol na kargang madaling mag-apoy an barko na dai man dapat kaibahan sa lugar kan mga pasahero.
Iginiit kan opisyal na igwa nin tamang paagi nin pag-imbak para sa mga arog kaining klase nin kargamento tanganing malikayan an ano man na aksidente asin pagkasulo.
Mientrastanto, nasa 71 sa mga nagadan na biktima an dai pa nakikila mantang padagos pa man giraray na hinahanap an walo pang nawawarang indibidwal.
Igwa pa nin ibang padagos na imbestigasyon an mga eksperto huli sa iba pang epekto kan pagkasulo kan barko sa sarong parte kan kadagatan na bistadong pangisdaan kan mga parasira sa Palawan.
