Ipinahiling kan Bureau of Fire Protection sa press briefing sa palasyo an aktuwal na kasulo sa MV June Aster sa paagi kan Artificial intelligence re-enactment.
Nagiromdoman na nasulo an barko kan Setyembre 9, 2026, harani sa Coron, Palawan, na ikinagadan kan 77 pasahero.
Segun sa paliwanag, posibleng nagkawsa nin pagliyab an pagkasaralak kan aspalto asin chlorine na kargamento kan barko na nakapwesto sa exhaust kan mismong makina.
An aso hale sa kasulo an posibleng nagin kawsa man kan suffocation kan mga biktima bago pa sinda nagkaigwa nin oportunidad na makaligtas hale sa nasusulong na barko.
Sa pinakahuring tala kan Philippine Coast Guard, 66 sa 77 na nagadan an naaraman na an pagkakakilanlan, mantang 11 an padagos pa man giraray na sumasairarom sa identification process.
