Pigbasura kan Sandiganbayan Third Division an ikaduwang Motion for Inhibition na isinangat ni dating Senador Bong Revilla kontra ki Associate Justice Karl Miranda sa saiyang kasong malversation, na konektado sa suboot ghost flood control project sa Pandi, Bulacan.
Iginiit kan korte na mayong basehan an akusasyon ni Revilla na may pagpabor si Justice Miranda, dawa pa tugang kaini an abogado kan state witness na si dating DPWH Undersecretary Roberto Bernardo, huli ta bako man partido sa kaso an nasabing abogado asin an mga prosekutor an nagpresentar kan saksi.
Tinanggihan man kan hukuman an argumento kan dating senador na an solong dissenting vote ni Miranda kontra sa saiyang piyansa nakadepende sana sa testimonya ni Bernardo, huli ta nakabase man ini sa iba pang saksi asin dokumento kan prosekusyon.
Pinlinaw man kan Sandiganbayan na an mga pahayag ni Justice Miranda manungod sa Good Conduct Time Allowance (GCTA) Law parte sana kan saiyang adbokasiya para sa mga preso asin bako patunay nin amay na paghusgar sa kaso.
Temporaryong nakaluwas si Revilla matapos magpiyansa sa paagi kan 2-1 na boto kan Sandiganbayan, kun sain nagpabor saiya sinda Associate Justice Ronald Moreno asin Associate Justice Fritz Bryn Delos Santos.
Mientrastanto, igwa man nin suway na petisyon an mga prosekutor kan Ombudsman na nagpapainhibit ki Justice Moreno sa kaso huli sa suboot bakong angkop na pagtrato kaini sa mga saksi kontra ki Revilla, na sa presente pigdedesisyunan pa kan korte.
