Piglalaoman na tatapuson na kan House prosecution ngunyan na semana an pagpresentar kan mga ebidensya kontra ki Vice President Sara Duterte, bago man ipresentar kan depensa an saindang panig sa impeachment trial sa Senado.
Segun ki lead prosecutor Atty. Gerville “Jinky Bitrics” Luistro, si financial expert Atty. Alexander Cabrera na an ultimong saksi kan prosecution sa alegasyon kan dae maipaliwanag na kayamanan.
Sa pagsusuri ni Cabrera, tinatantya na P817.87 milyon an sinasabing dae naideklarang kayamanan asin kita ninda Duterte asin agom na si Manases “Mans” Carpio poon 2022 sagkod 2025. Kabali sa sinuri an mga rekord kan bangko, tax returns, SALN, asin mga dokumento kan mga kumpanyang may koneksyon sa mag-agom.
Magpapadagos an paglilitis ngonian na Lunes, Oktubre 12, para sa paghapot kan depensa ki Cabrera asin mga hapot kan mga senador na nagsisirbing hukom.
Nakumpleto na kan prosecution an pagpresentar kan ebidensya sa Articles I asin IV, na dapit sa sinasabing salang paggamit kan confidential funds asin grave threats. Binawi man kaini an Article III na may koneksyon sa alegasyon nin bribery.
Pagkatapos kan paghapot ki Cabrera, mahagad an prosecution nin giya sa Senado manungod sa pormal na pagsumite kan mga dokumento bilang ebidensya asin sa posibleng pag-atubang nin dugang na saksi.
An mga alegasyon kontra ki Duterte kaipuhan pang surion kan depensa asin timbangon kan Senado bilang impeachment court.
Kinumpirma man ni Luistro na pormal na nindang i-withdraw an Article III, an bribery case kontra ki VP Sara Duterte.
