Inaprobaran na kan Sangguniang Panlalawigan kan Camarines Sur an sarong resolusyon na nagdedeklara sa bilog na probinsya sa irarom kan state of calamity huli sa padagos na paglangkaw kan kaso nin dengue.
Ipigtulod ni Board Member Donna Oñate an resolusyon, na nagmamawot na maparikas an mobilisasyon kan pondo, kagamitan asin iba pang kinakaipuhan na rekurso para magresponde sa paglakop kan dengue.
An resolusyon nakabase sa Republic Act No. 10121 o Philippine Disaster Risk Reduction and Management Act of 2010, kasunod kan rekomendasyon kan Provincial Disaster Risk Reduction and Management Council (PDRRMC).
Sa irarom kan inaprobaran na lakdang, tututukan kan gobyerno probinsyal asin lokal na gobyerno an pag-implementar kan “find and destroy” na kampanya para maaraman asin mahale an mga lugar na posibleng magtago nin mga namok na nagdadara nin dengue.
Kabali man sa mga prayoridad an amay na pagdetektar kan mga kaso, marikas na pagrefer kan mga pasyente asin pagpapakusog kan mga lakdang tanganing maprotehiran an mga kaakian asin iba pang vulnerable sectors.
Sa paagi kan state of calamity declaration, piglalaoman na magigin mas marikas an pagpapaluwas asin paggamit kan kinakaipuhan na resources para sa mga lugar na apektado kan outbreak.
Nangapudan ini sa mga munisipyo asin barangay na pakusugon an kampanya kontra sa dengue asin siguraduhon na tulos na matawan nin atensyon an mga pigdududahan na kaso ngani na dae na maggrabe pa an sitwasyon.
