Nag-aandam na an mga lokal na gobyerno sa Bicol Region sa posibleng grabeng epekto kan inaapod na Super El Niño, partikularmente an huma kan halawig na tigmara asin kawaran nin pag-uran.
Sa paghampang sa mga Kagawad kan Media ni Gabriel “Gabby” Bordado Jr., Naga City Vice Mayor, sinaysay kaini na importante para sa mga lokal na gobyerno na magin proaktibo sa pagbilog nin mga programa asin lakdang tanganing mabawasan an epekto kan climate change asin iba pang climate-related hazards sa mga komunidad.
Pigduon ni Bordado an kahalagahan kan kolaborasyon o kooperasyon kan manlaen-laen na sektor kan komunidad tanganing mas maging epektibo sa pagpreparar sa posibleng epekto kan climate change.
Dugang pa kaini na an pangangaipo para sa mas marahay na pagplano asin pag-integrar kan mga konsiderasyon sa pagbabago kan klima sa mga programa kan mga lokal na gobyerno.
An Metronaga Development Council na binibilog kan 18 LGUs kabali an San Pascual, Masbate asin mga lokal na gobyerno sa Camarines Sur asin Masbate nagkondusir man nin duwang aldaw na workshop na nakasentro sa climate change preparedness asin disaster resilience.
Segun ki Bordado, importante para sa manlaen-laen na departamento kan mga lokal na gobyerno na magkaigwa nin supisyenteng kaaraman asin pagsasanay tanganing magin preparado sa anuman na epekto kan climate change.
Ipinahayag man kaini na kabale sa mga mayor na programa kan administrasyon ni Naga City Mayor Leni Robredo iyo an mga lakdang na may kinaaraman sa pagpreparar asin pagresponde sa climate change.
Mientrastanto, plano man kan sanggunian na imbitaran an mga opisyales kan Climate Change Commission tanganing magkondusir nin briefing sa Sangguniang Panlungsod sa laog kan bulan nin Oktubre.
Katuyuhan kan briefing na matawan nin mas up-to-date na impormasyon asin giya an mga lokal na opisyales para mas mapakusog pa an preparasyon kan ciudad asin pagtaraid na komunidad sa posibleng epekto kan climate change asin El Niño.
