Nag-aandam na an mga eskwelahan sa Camarines Sur para maseguro an kaligtasan asin karahayan kan mga paratukdo asin mga estudyante sa panahon kan grabeng init na dara kan El Niño.
Sa intrevista kan Bombo Radyo Naga kay Salvador Bogs Pelingon – Division Information Officer, Deped-Camarines Sur, sinaysay kaini na posibleng maiimplementar an alternatibong learning modality kun magin sobra an init sa mga eskwelahan.
Dugang pa ni Boggs-Pilingon, kabale sa mga pigkokonsiderar iyo an kamugtakan kan mga lumang classroom na mayo nin magkakanigong aircon, lalo na kun maglangkaw an temperatura.
Kun kinakaipuhan, mapaluwas nin memorandum an DepEd tanganing tugutan an mga eskwelahan na magbalyo sa alternatibong modalidad nin pag-adal bilang kasimbagan sa epekto kan labi-labing init.
Importante man an regular na pag-monitor kan weather forecast ngani na maabisuhan an mga eskwelahan asin makapag-andam nin magkakanigong interbensyon tanganing maprotehiran an mga estudyante asin paratukdo.
Pinapagirumduman an mga eskwelahan na maging alerto asin pirming iprayoridad an kaligtasan kan mga nasa eskwelahan, partikularmente sa panahon na halangkaw an heat index.
