Nabisto na kan Goa Municipal Police Station (Goa MPS) an mga indibidwal na imbuelto sa nag-viral na video kan sarong rider na irido makalihis an road rage incident sa Barangay Catagbacan, Goa, Camarines Sur, poco mas o menos alas 4:00 nin hapon. sa Oktubre 10, 2026.
Sa follow-up investigation, narekober kan mga pulis an sarong puti asin asul na Honda Beat na may plakang E438HT. Binisto an driver na 21 anyos asin 19 anyos an pasahero asin rehistradong kagsadiri. Segun sa saro sa mga imbweltong indibidwal, inunat kaini an saiyang kamot tanganing maibitaran an banggaan asin naghale sinda huli sa takot para sa saindang kaligtasan.
Mga alas 1:25 n.h. kan Oktubre 11, an biktima nagsangat nin Affidavit of Desistance pagkatapos kan saindang makikatood na pag-areglo, na nagpapahayag kan saindang desisyon na dai na magpadagos nin dugang pang legal na aksyon.
Mientrastanto, nagpaluwas man nin Show Cause Orders an Land Transportation Office (LTO) Partido District Office kontra sa driver asin kagsadiri kan motorsiklo. An motorsiklo ibinalik sa rehistradong kagsadiri asin ibinugtak sa irarom nin 30 aldaw na restriksyon, mantang naghahalat nin pagsunod sa mga kahagadan kan LTO.
Nagpagirumdom an Goa MPS sa gabos na mga motorista na magsunod sa mga ley sa trapiko, maingat sa pagmaneho, asin igalang an mga kapwa paragamit kan tinampo. An personal na mga detalye kan mga imbuelto dai pigbubuyagyag susog sa Republic Act No. 10173 o sa Data Privacy Act of 2012.
