Pinapakusog kan Iriga City Science High School an saindang mga polisiya asin programa para maseguro an kaligtasan asin salud kan isip kan mga estudyante.
Sa intrevista kan Bombo Radyo Naga ki Virgilio S. Puso – Principal, Iriga City Science High School, sinabi kaini na mayo pa sindang narerecord na insidente nin panraratak, dawa tangani may nagkapirang menor de edad na insidente na naireport sa saiyang opisina.
Kabali sa mga lakdang kan eskwelahan an implementasyon kan Child Protection Policy asin Anti-Bullying Policy, siring man an mga Space Talks kan Principal na nagtutukar kan paggalang, digital citizenship, inklusibo, asin responsableng paggamit kan internet.
Aminado si Puso na saro sa pigkakahampang pa kan eskwelahan an kawaran nin guidance counselor, urog na sa pag-atubang sa mga estudyante na nakakaeksperyensya nin personal na problema asin academic stress. Alagad, nagkokondusir sinda nin mga aktibidad tanganing matabangan an mga estudyante na magrelax asin mawara an stress.
Pig-enkaminar ni Puso an mga paratukdo, magurang, asin mga estudyante na magtarabangan sa pagmantenir nin ligtas na kapalibutan kan eskwelahan. Pigsierto man kaini na bukas an saiyang opisina sa sisay man na estudyante na nangangaipo nin tabang o gustong magreport nin anuman na problema.
