Pinapakusog kan gobyerno kan ciudad an preparasyon para sa posibleng epekto kan El Niño, partikularmente sa sektor nin agrikultura asin food security.
Sa paghampang sa mga kagawad kan Media ni Naga City Mayor Leni Robredo, sinabi kaini an syudad nagtatrabaho kaiba an Departamento nin Agrikultura (DA) asin mga pribadong kasosyo, kabali an Taiwan Economic and Cultural Office, tanganing mamidbid an mga angay na pananom asin makahanap nin mga makabagong paagi na makakatabang sa mga paraoma na makaadaptar sa epekto kan El Niño.
Kasabay kaini, pigpapauswag an komprehensibong pag-audit kan mga dagang pang-agrikultura tanganing maaraman kun arin sa mga daga na rehistrado bilang dagang pang-aoma an talagang ginagamit sa pag-oma. Base sa mga opisyal na rekord, mga 50 porsyento kan daga an pigklasipikar bilang agrikultural, alagad pigkakarkulo na 16 sagkod 19 porsyento sana an aktuwal na ginagamit sa agrikultura.
Importante an pag-audit na ini tanganing maprotehiran an mga oma sa pagpabakal asin sa huri pagkombertir, orog na sa atubang kan huma kan El Niño na pwedeng makaapektar sa produksyon nin kakanon.
Kabali man sa mga lakdang an pagtao nin suporta sa mga paraoma tanganing mamantenir an saindang kabuhayan asin pag-engganyar sainda na padagos na gamiton an saindang mga dagang pang-agrikultura.
Ipigtawan-duon pa ni Robredo na importante an amay na pagplano, tamang paggamit kan daga, asin koordinasyon kan gobyerno asin sektor nin agrikultura tanganing mabawasan an epekto kan El Niño asin mamantenir an suplay nin pagkakan kan ciudad.
