Personal na nagbisita si Department of Education Secretary Sonny Angara sa Banga National High School sa South Cotabato ngonian na aldaw, Setyembre 19 kasunod kan trahedya pambabadil sa eskwelahan nganing pangenotan an tulos na mga aksyon asin magtao nin tabang sa mga apektadong pamilya asin personahes.
Nakipagpulong si Secretary Angara sa mga tawohan kan eskwelahan, mga magurang, mga lider kan lokal na gobyerno, asin an mga pulis, tanganing ikoordinar an mga pagresponde sa emerhensya, magbugtak nin mga kritikal na serbisyong psychosocial, asin atubangon an mga isyu sa seguridad.
nag-inspeksyon an sekretaryo man kan eskwelahan, nag-atender sa sarong security briefing asin debriefing session para sa mga paratukdo asin mga tawohan, nagbisita sa mga lolobngan kan mga biktima, asin nag-enkaminar sa mga nalugadan sa ospital.
Idinoon ni Angara an pangangaipo para sa tulos na pag-ataman, pag-abot sa komunidad, asin proaktibong mga interbensyon sa salud nin isip tanganing maibitaran an kaparehong mga pangyaya
“No words can undo the grief and trauma felt by our families here in Banga. Our primary duty right now is care, providing real, sustained support to our learners, teachers, and personnel,” sabi pa ni Angara.
Hinagad kan DepEd sa mga opisyales kan barangay asin security guards na magtao nin dagdag na suporta para sa mga police patrol, lalo na sa mga escuelahan na daeng sadiring security guard.
Pig-prioritize man ni Angara an amay na suporta sa salud nin isip, na nagsasabi na an mga isyung may relasyon sa gawi-gawi kan mga estudyante nangangaipo nin interbensyon kan bilog na komunidad.
