Laoman na magigin marhay asin maabot an lebel kan produksyon kan nakaaging taon sa pag-ani nin paroy ngunyan na Oktubre asin Nobyembre, segun ki Engr. Rosendo So, Chairman kan Samahang Industriya ng Agrikultura (SINAG).
An presenteng ani, ipinapaliwanag ni So na dai pa gayo namamatian an epekto kan grabeng tagtuyot hale sa Super El Niño, na posibleng magtama sa masunod na cropping season poon Nobyembre sagkod Marso.
Huli kaini, pinagirumduman kan pamayo kan SINAG an mga paraoma na an mayong supisyenteng irigasyon na magtanom muuna nin mga high-value crops tanganing mabawasan an posibleng lugi sa saindang kabuhayan.
Idinugang man ni So an kahalagahan kan amay na pagtao nin fuel subsidy bago pa man magpoon an bagong planting season tanganing magamit tulos ini sa mga pangangaipo sa umahan.
Nagdadanay na susi an marikas na pagpreparar asin napapanahon na suporta kan gobyerno tanganing mapagdanay na matatag an produksyon nin pagkakan sa tahaw kan huma kan El Niño.
