Iginigiit ni Presidente Ferdinand “Bongbong” Marcos Jr. na kaipuhan enot na maaraman an katotoohan asin makakua nin ebidensya manungod sa mga alegasyon ni Bise Presidente Sara Duterte na siya an nasa likod kan sinasabing pagpalya sa Bise Presidente.
Sa sarong panayam sa Kapihan sa Singapore, sinabi ni Presidente Marcos na an mas nakakabahala iyo an sinasabing pondo hale sa China na, kun mapapatunayan na totoo, maituturing na banta sa seguridad nasyonal sa pinakahalangkaw na lebel.
Ipinagsugo man ni Presidente Marcos an sarong masusing imbestigasyon sa alegasyon na igwang pondo hale sa China na nagresibe si Bise Presidente Sara Duterte.
Segun sa Presidente, seryoso an isyu asin kun mapapatunayan na totoo, maituturing ini na saro sa pinakadakulang banta sa Pilipinas huli ta nakataya an soberanya asin seguridad kan nasyon.
Sinabi niya na tama sana na imbestigaran kan DND an nasabing isyu huli ta parte ini kan saindang mandato.
Minsan siring, sinabi ni Presidente Marcos na dai muna siya magtatao nin konklusyon sagkod na dai pa napapatunayan an alegasyon.
Pinabulaanan man ni Presidente Marcos na nakikiaram siya sa impeachment proceedings kontra ki Bise Presidente Sara.
Idiniin kan Presidente na an nasabing isyu pinapabayaan niya na gampanan kan Senado an saiyang katungdan.
Segun sa Punong Ehekutibo, nakatutok siya sa pagtupad kan mga programa kan administrasyon bago matapos an saiyang termino.
